الحلقه الثانية عشر من برنامج رحلة للسعاده كتابه بصيغة PDF

الإثنين أغسطس 23, 2010 6:05 pm

الحلقه الثانية عشر من برنامج رحلة للسعاده كتابه بصيغة PDF Reg_5872_d84a752b57fcb1c71ecd687f586890c6

الحلقة 12 - لا للذل - أوعه تهين نفسك

بسم الله الرحمن الرحيم الحمد لله رب العالمين والصلاة والسلام على رسول الله صلى الله عليه وسلم. أهلا
بيكم في رحلة للسعادة إحنا في المجموعة التالتة، خلصنا أول مجموعة .. أول
مجموعة كانت ابدأ بداية صحيحة.. ارسم خطك للجنة، وبعدِيّن المجموعة التانية
إسعد الناس حولك ربنا يسعدك وكان اللون الأخضر لون الزرع والخير والنماء،
وبعدِيّن إتنقلنا على المجموعة التالتة للسعادة من المجموعات السبعة اللي
إحنا بنقول فيها عايز تكمل تعيش سعيد في دنيتك ديا وتبقى عارف ملامح
السعادة ده إزاي.. وتمسكها إزاي.. وتوصلها إزاي.. يبقى كمل السبع مجموعات.

إحنا
في المجموعة التالتة وزي ما قلنا كان إسمها نفس نقية من موانع السعادة، في
حاجات بتمنع من السعادة..إزاي تبقى نفسك نقية من موانع السعادة؟ قلنا لا
للقلق وقلنا حسن الظن بالله وقلنا لا للغضب وقلنا الرفق والحلم وبعدِيّن
قلنا لا للكراهية وقلنا اختلف برحمة، وإنهاردة ما زلنا ماشيين مع الموضوع
الرابع من موانع السعادة .. قبل ما أقول موضوع إنهاردة لأنه مش واضح قوي
خليني أفكركوا.. المجموعة ديه رمزنالها باللون الأحمر.. لون الخطر وحطنالها
العلامة ديه علامة ممنوع الدخول، إوعى تمشي وتخش على السكة ديه إبعد عن
الطريق دوت، اللاءات الأربعة بتاعة السعادة .. لا للقلق، لا للغضب، لا
للكراهية والحقد والحسد حلقة إمبارح، وإنهاردة اللا الرابعة.. لا لإيه؟ مش
هقولك دلوقتي هقول الأول الفكرة بتاعتنا، الفكرة بتاعتنا إيه؟ ناس كتير
بتتصل بيا وبالذات الشباب والبنات الصغيرين.. بيقولوا إيه؟ يقول أنا سعات
مابعرفش إمتى أفرق بين إن أنا أبقى سعيد وغير سعيد، وسعات أبقى سعيد وفجأة
مش عارف ليه مودي يتقلب وتلاقيني حزين جداً، من خمس دقايق كنت سعيد.. إزاي
التغيير الفجائي ده حصلي أنا مش عارف! الحلقة ده بتتكلم عن الموضوع دوت،
إزاي النقلة اللي بتحصل وإيه السبب؟ إزاي نتنقل فجأة من سعيد لغير سعيد وفي
لحظات قليلة؟! خلينا أقولكم يا جماعة السعادة زي الإيمان، الإيمان بيزيد
وينقص والسعادة كمان بتزيد وتنقص، بس أكيد في أسباب بتخلينا نتحول فجأة من
سعيد إلى غير سعيد، إيه الأسباب ده؟ وهل هي أسباب خارجية ولا كتير منها
نابع من النفس؟ صدقوا كتير منها نابع من النفس.. الحلقة دِيّن سبب رهيب
يخليك تتنقل فجأة من عادي وكويس ومبسوط وكله تمام لفجأة حزين وتعيس وشاعر
بمرارة وضيق وهم وغم، إيه الموضوع دون وإيه المانع الرابع من موانع السعادة
اللي يخليني أتنقل كدة؟

عشان
أشرحهولك لازم أسألك سؤال، إنت بتحب نفسك؟ هتقولي تقصد إيه بتحب نفسك،
يعني تقصد إن أنا أناني، تقصد إن أنا بحب نفسي ومش بحب الآخرين؟ لا لا لا
ده معني، بس في معنى تاني لكلمة بحب نفسي يعني بعزها أصلها غالية عليا..
أصل نفسي ده غالية عليا قوي وبقدرها قوي، خلي بالك من المعنى دوت لو نفسك
غالية عليك قوي وإنت حاسس جواك بكدة.. مش هتهنها، كإن موضوع الحلقة بيقول
إوعى تهين نفسك إوعى والذل لنفسك، أربع موانع للسعادة الرابعة فيهم إوعى
تهين نفسك.. إوعى تذل نفسك.

أشرحلك
أكتر؟ عملوا إحصائية إيه أكتر كلمة بيستخدمها الناس في التليفونات؟ وقعدوا
يقيسوا إيه أكتر كلمة بيستخدموها؟ يا ترى تفتكروا أكتر كلمة كانت إيه؟
كانت ألو ولا إيه؟ طلعت أكتر كلمة أنا، طبيعة النفس البشرية إنه يحب يحس
بنفسه معزز مكرم، أنا غالي أنا مقدر أنا قيمتي كبيرة، عشان كدة المانع
الرابع من موانع السعادة إوعى تهين نفسك، إوعى تهين نفسك قدام الناس وإوعى
تهين نفسك قدام نفسك، إوعى وإهانة النفس إوعى تذلها إوعى تهنها.. مش شرط مع
الناس، هما حاجتين إوعى تذلها قدام الناس وإوعى تذلها قدام نفسك، لأنك أول
ما تهين نفسك يحصل للسعادة زي الأسانسير اللي فك من الفرامل بتاعته فحصل
هبوط مفاجئ تبص تلاقي روحك بتتسحب،
عارف في الملاهي اللعبة اللي يطلعوا فوق فوق فوق ويقوموا نازلين فجأة،
عارف بيحصل إيه للروح أهو بيحصل في السعادة كدة، أول ما تهين نفسك قدام بني
آدم أو قدام نفسك هبوط مفاجئ وتحس إن روحك اتسحبت، عايز أقول إيه؟ عايز
أقول ربنا لما خلق البني آدم خلق فيه تلات غرائز، يعني ربنا لما خلق الناس
خلق تلات غرائز، غريزة الأكل والشرب غريزة الجنس وفي غريزة تالتة إسمها
إيه؟ الاعتزاز بالنفس، طيب الأولى والتانية معروفين غريزة الأكل والشرب
وغريزة الجنس مفهومين، لكن الغريزة التالتة إيه؟ يعني غريزة الاعتزاز
بالنفس دِيّن عبارة عن إيه؟ إيه هي غريزة الاعتزاز بالنفس؟ غريزة الاعتزاز
بالنفس ده يا جماعة عايزة توضيخ، أنا بحب إنجازاتي أنا بحب إن أنا أكون
مكرم، أنا بحب تبقى صورتي الذهنية حلوة قدام ولادي قدام مراتي قدام عيلتي
قدام صحابي قدام الدنيا كلها.. أنا معتز بنفسي وفخور بنفسي وأحب إن أنا بعد
ما أموت وبفكر في الحكاية ده إن يفضل يتقال عليا كلام كويس.. غريزة
الاعتزاز بالنفس.

طيب
ممكن أسألكم سؤال؟ دول التلت غرائز اللي ربنا خلقهم وأوجدهم فينا، طيب ليه
ربنا أوجد التلت غرائز دول فينا؟ طيب الأولى والتانية معروفين غريزة الأكل
والشرب والجنس ليبقى البشر موجودِيّن، لكن غريزة الاعتزاز بالنفس ده ربنا
حطها فينا ليه؟ كان ممكن تبقى مش موجودة، ليه ربنا غرز في كل البشر من آدم
ليوم القيامة أياً كان دينهم أو لونهم أوجنسهم كبار صغيرين غريزة الاعتزز
بالنفس؟ حتى الأطفال لو أهنته يعيط، الغريزة ده ليه ربنا حاططها؟ عشان ربنا
بيحبنا، إيه العلاقة؟ عشان الأرض ماتنحرفش، يعني إيه؟ ما هو جزء من الناس
خايفة على صورتها إنها تتفضح إنه يبقى شكله وحش، حريص أنه يستر نفسه، حريص
إن هو يجمل نفسه.. ليه؟ عشان ربنا حاطط جواه الاعتزاز بالنفس ولو دِه مش
موجودة تخيل كمية الفساد اللي في الأرض وبمنتهى البجاحة، فربنا حط الغريزة
ده عشان الأرض تكون أقل إنحرافاً، يعني شوف الأرض فيها إيه دلوقتي، تخيل
بقى لو الغريزة ده كمان مش موجودة كان حصل إيه في الأرض.

فهمت
الفكرة.. فالغريزة ده ربنا حطها فينا عشان يخلي الأرض أكثر رحمة للناس
ببعضها وكل واحد يبقى حريص على صورته، أب خايف على صورته قدام ولاده فمش
عايز يعمل المصيبة الفلانية عشان قدام ولاده.. وموظف مش عايز يرتشي عشان
خايف على صورته قدام عيلته وفي الجرايد وعمال يكتم على نفسه علشان خايف على
صورته.. الصورة الذهنية قدام الناس غريزة الاعتزاز بالنفس، أول لحظة إهانة
النفس لو أهنت نفسك أمام الناس أو أمام نفسك فجأة تسقط من عين نفسك، عارف
يعني إيه تسقط من عين نفسك؟ تخيل كمية التعاسة، عرفتوا أحد أسباب تغير
المود المفاجئ من سعادة وانشراح تحصل حاجة.. أهنت نفسك في حاجة.. غلطت في
حاجة خلت شكلك وحش.. عملت تصرف ذليت نفسك قدام بني آدم، هو ربنا خالقنا كدة
فجأة تهبط من فوق لتحت في دقيقة.. لحظة إهانة النفس عشان ربنا خالق جواك..
مركب جواك حاجة، حاجة متركبة جوا بتنور كدة، عارف المنبه لما يقعد يرن
عشان يصحيك.. جواك حاجة إسمها إعتز بنفسك.. إعتز بنفسك.. إعتز
بنفسك..عارفين في المولات في أوربا وبعض الدول لما تكون بتشتري حاجة من
المحل وواحد سرق حاجة وبعدين طالع من المحل ومادفعش تمنها وهو على باب
المحل بيحصل إيه؟ في جهاز محطوط بيعمل إيه؟ زمارة.. حرامي حرامي حرامي إجري
إمسك، تصدق ربنا مركب جواك حاجة زي كدة، أول ما تهين نفسك أول ما تذل
نفسك، حاجة إسمها الضمير ده متركبة فين؟ ربنا مركبها جواك، تبدأ تزمر تعرق
ويحمر وشك وعنيك تزيغ وتهبط وتقع، إوعى تهين نفسك.

أدّيك
أمثلة؟ أدّيك أمثلة إزاي الناس بتهين نفسها؟ مدمن المخدرات أهان نفسه..
شكله وهو بيدمن.. وشكله عشان يسرق من أمه عشان يدمن.. وشكله وهو بيعمل
جريمة عشان يدمن.. وشكله بعد ما تعاطى المخدرات وتبص عليه.. منتهى الإهانة
منتهى إهانة النفس، شارب الخمر، شارب الخمر أهان نفسه، تخيل وهو بيرجّع
تخيل وهو في الشارع بيهذي تخيل مثلا -أنا آسف في الكلمة- وهو بيتبول في
الشارع تخيل المنظر دوّن شايف الأهانة؟ ولذلك يا شباب أوعوا تصدقوا اللي
يضحك عليكم ويحطلك إعلان مكتوب عليه إشرب كذا واسترجل، إشرب خمرة خليك راجل
إوعى تصدق الإعلان ده، ده منتهى الإهانة ده عيب إنه يتحط لأنه بيهينك.

من
إهانة النفس أنا أعرف قصة واحد سرق من محل وصاحب المحل بدأ يشك أن هو
بيسرق وهو عمال ياخد من المحل.. ياخد من المحل ويجي يسأله على الحساب يقوله
لا ده الزباين اشتروا بضاعة بتمن أقل وهو مغلي التمن عن التمن بتاع المحل
وعمال يكسب يكسب يكسب، صاحب المحل اتفق مع ناس قالوهم تروحوا تشتروا منه
وتسيبوه يبعلكم ويشترلكم بالتمن اللي هو عايزه، راحوا قالوله ده بكام صاحب
المحل كان مسعرها بخمسين قالوهم لا ده بسبعين فخد العشرين في جيبه بالليل
جه صاحب المحل قاله بعت بكام قاله بعت بخمسين وهو حاطط عشرين في جيبه بعد
خمس دقايق دخلوا الناس اللي اشتروا، شفت هيحصل إيه دلوقتي وقدام بعض قاله
فين العشرين إنت بعتلهم بكام، تخيل إهانة النفس عارف حصله إيه؟ وقع مغمى
عليه.

إوعى
تهين نفسك عايز تعيش سعيد إوعى من العلامة ده إوعى من علامة إهانة النفس،
إوعى تهين نفسك حافظ على نفسك درب نفسك إن أنا مش ههنها، وقبل ما تاخد أي
خطوة إسأل نفسك فيها إهانة؟ ههين نفسي، وكلنا بنغلط يا جماعة إوعى تفتكر من
كلامي إنك مش هتغلط أو إوعى تفتكر من كلامي إن أنا بقولك خليك مثالي بس لو
سمحت لو أهنت نفسك في موضوع معين قبل كدة.. ماتعملهوش تاني، مش معقولة
واحد ينزل من بيته كل يوم يلاقي حفرة قدام البيت وكل يوم بيقع فيها تخيل
بقاله عشرين سنة بيقع في نفس الحفرة ده تقول عليه إيه.. يعني ده ضايع، إوعى
تهين نفسك، الشاب اللي عاكس بنت في الشارع وبعدِيّن في وسط ما هو بيعاكسها
أخوها مسكه شايف إهانة النفس، أنا بضربلك أمثلة إزاي الناس بتهين نفسها،
مسكه قعد يعيط شفته المنظر ده في الشارع قبل كدة؟ ويقوله والله ماعملتلها
حاجة.. ياه بص عامل إزاي متخيل إهانة النفس، شايفه وهو بيعمله كدة شايفه
وهو بيعيط وشايف أخوها ماسكه.

أعرف قصة واحد وواحدة راسلوا بعض بالـ chat وقعدوا يراسلوا بعض بالـ chat
يجي سنة ما شافوش بعض وبعدِيّن إتواعدوا يتقابلوا راح يقابلها طلعت مراته،
قصة حقيقية..وقفوا قدام بعض وجهاً لوجه.. طلقها كان لازم يطلقها مش عشان
مين غلط عشان ماعدوش قادرين يبصوا في عنين بعض، إوعى تهين نفسك حافظ على
نفسك ماتهنهاش، ده حلقة إنهاردة بمنتهى الوضوح، خلي بالك مستحيل أقولك
ماتغلطش بس على الأقل الحاجة المعينة اللي إنت عارف إنك بتهين نفسك فيها
بقالك عشر سنين وهي سر تعاستك وإنت بتعملها عشان تبحث عن سعادتك ممكن
توقفها، يعني العاقل اللي يشوف هيحصل إيه نتيجة اللي أنا بعمله، فممكن لو
سمحت ماتهنش نفسك، ممكن تقعد دلوقتي إسكت كدة لمدة ربع دقيقة واسأل نفسك
إيه الحاجات اللي أنا بهين فيها نفسي وهي مصدر شقائي، عرفتوا يا بنات
عرفتوا يا شباب إمتى بينزل الأسانسير فجأة من سعادة فجأة هبوط حاد زي هبوط
في الدورة الدموية.. هبوط حاد في السعادة، من سعادة إلى فجأة حزن وهم
وتعاسة وضيق ومرارة وخجل بتحصل إزاي؟ بتحصل بسبب الحكاية ديه، أديني حطيت
إيدك على حاجة تعرف بيها إزاي بتنتقل من السعادة إلى الشقاء.

طيب
ممكن آخد معاك حاجة أكتر من كدة؟ إحنا في زمن صعب إنتوا عارفين المشكلة
إيه؟ إن الناس دلوقتي هانت عليهم نفسهم، وإيه يعني.. آه هاخد رشوة.. آه
هعاكس بنات.. آه هعمل كذا وإيه المشكلة ربنا بيقول [ وَلَقَدْ كَرَّمْنَا بَنِي آَدَمَ...] {الإسراء:70}، لما
غرزنا جواه الاعتزاز والتكريم للنفس، إحنا في زمن صار إهانة النفس حاجة
عادية، وعلى فكرة ده من أسباب شقاء البني آدم الآن، والتكنولوجيا عمالة
بتزيد والتكنولوجيا بتيح للناس سهولة التعامل والناس عمالة تنزل في التعاسة ليه؟ لأن في شقاء، ليه؟ لأن بقى في مجاهرة عرفتوا ليه النبي بيقول (كل أمتي معافى إلا المجاهرين)
مالهم المجاهرين؟ مالهمش معافاة لا في الدنيا ولا في الآخرة، مالهمش
معافاة، في الآخرة نار.. ومالهمش معافاة، في الدنيا تعاسة وشقاء وضلال،
كأني عايز أقولك إيه؟ كأني عايز أقولك الأول إوعى تهين نفسك ثانياً الستر،
إوعوا يا شباب ويا بنات إوعى تدخل على النت وعادي بتتكلم وبتقول وأنا عملت
وأنا سويت إوعى تجاهر بإهانة النفس، إوعوا تقفوا في الشارع وتعملوا ذنب
كبير وتبقى إنت وبنت في عربية في وسط شارع وعادي ماحدش له عندي حاجة ده
أسوأ (كل أمتي معافى إلا المجاهرين) إذا كان الزمن وحش فماتتسببش في
تعاسة فوق تعاسة فوق تعاسة، يعني أولاً ماتهنش نفسك ثانياً استر نفسك،
ثالثاً إوعى تجاهر المجاهرة وحشة..المجاهرة تضيع معافاة ربنا.. غضب من ربنا
سبحانه وتعالى، إوعى تهين نفسك.

إوعى
تهين نفسك ده اللا الرابعة من موانع السعادة، إوعى تذل نفسك، يا جماعة إنت
غالي قوي على الله، إنت مقدر وعزيز جداً على الله، إنت مش واخد بالك إن
إنت خلاصة الخلق، إنت واخد بالك من المعنى ده؟ يا جماعة إحنا خلاصة الكون..
خلاصة الخلق، يعني ربنا سبحانه وتعالى خلق الكون وإنت ثمرة الكون قال
تعالى [... كَرَّمْنَا بَنِي آَدَمَ...] {الإسراء:70}، إنت مش ثمرة الكون.. ربنا خلق الكون واختصر الكون فيك، زي ما اختصر القرآن في الفاتحة اختصر الكون فيك إنت، [ وَالتِّينِ وَالزَّيْتُونِ(1) وَطُورِ سِينِينَ(2) وَهَذَا البَلَدِ الأَمِينِ(3) لَقَدْ خَلَقْنَا الإِنْسَانَ فِي أَحْسَنِ تَقْوِيمٍ(4) ثُمَّ رَدَدْنَاهُ أَسْفَلَ سَافِلِينَ (5) ]. {التِّين: 1-5} وذلك
بإهانة نفسه، ربنا يريد لك العزة ويريد لك الكرامة لكن ومن يهن الله
بإهانته لنفسه فما له من مكرم، إوعى تهين نفسك إنت غالي على الله إنت عزيز
على الله، ده إنت ربنا خلقك من أنقى عنصرين في الوجود طين ومية، التراب
والمية أنقى عنصرين، المية تغتسل بيها وتتوضأ بيها وتنضف كل حاجة بيها،
مالقتش؟ التراب نضيف.. إنت نقي إنت خلاصة الكون.. ثمرة الكون.. ليه تهين
نفسك؟ ليه بعد ما ربنا خلقك في أحسن تقويم تنزل نفسك قوي كدة وتنزل وتفقد
سعادتك وتخسر.

تعالى
أحكيلك النبي صلى الله عليه وسلم بيعامل الناس إزاي، وبيكرم الناس إزاي،
وحتى لو واحد غلط إزاي مايهنوش، النبي صلى الله عليه وسلم في يوم فتح مكة
مين أكتر واحد أذى النبي صلى الله عليه وسلم أبو جهل مش كدة؟ مافيش أكتر من
كدة، ومين معاه؟ إبنه عكرمة بن أبي جهل، إتفتحت مكة.. النبي صلى الله عليه
وسلم قال للناس كلها إذهبوا فانتم الطلقاء صح؟ لكن قال فيه عشرة ( من وجدهم متعلق بأستار الكعبة فليقتلهم )
من كتر ما هو أساء منهم عكرمة بن أبي جهل، لكن مِرات عكرمة بن أبي جهل
جريت ورا عكرمة لأنه هرب من مكة لجدة عايز يركب البحر ويهاجر، فجريت وراه
بعد ما رجعت للنبي وقالتله يا رسول الله أمِّن عكرمة، فالنبي قالها أمنا
عكرمة، فراحت جابت عكرمة، وعكرمة جاي للنبي –صلى الله عليه وسلم- فهو جاي
من بعيد والصحابة قاعدِيّن..آه نعمل فيه إيه ده ياما عمل فينا.. شوف النبي
–صلى الله عليه وسلم- هيقولهم إيه ( الها الناس يأتيكم عكرمة فلا تسبوا أباه فإن سب الميت يؤذي الحي ولا يبلغ الميت ) هيجلكم عكرمة ماتهنهوش في أبوه، أبوه.. أبو جهل يا رسول الله اللي عمل وعمل وعمل، (يأتيكم عكرمة فلا تسبوا أباه) لأنك هتؤذيه (يؤذي الحي ولا يبلغ الميت) مش
هتوصل لأبو جهل، أحياناً الواحد بيغلط يا جماعة ولازم يتعاقب بس إوعى
تهينه إوعى تهين ولادك وإنت بتعاقبهم إوعى تهين مراتك، ولذلك شوف النبي
مثلا، بيقولك ( ما ضرب رسول الله إمرأةً ولا خادماً ولا طفلاً قط ) وينهى
إن حد يضرب على الوش.. ليه؟ إهانة، الوش رمز الاحترام ورمز التقدير لو
ضربته على وشه أهنته، إوعي تضربي إبنك بالقلم.. إوعى تضرب ولادك بالقلم..
إوعى تعمل كدة.

شوف
النبي –صلى الله عليه وسلم- واحد لازم يتعاقب لأنه عمل جرم لكن مش هيهينه
ويفضل ماشي معاه لغاية الحد اللي بعديه بشعرة تبقى إهانة، لأ.. يوقّف،
شوفوا عمل إيه، في واحد من بني حنيفة.. بني حنيفة كانوا أعداء للنبي وطلع
منهم مسيلمة الكذاب في اليمامة، منهم واحد إسمه ثمامة بن أثال، ثمامة دون
مرة أغار على مجموعة من الصحابة وقتل واحد منهم ففي دم بينا وبينه، فالنبي
–صلى الله عليه وسلم- كان في مجموعة من الصحابة في غزوة من الغزوات أسروا
ثمامة، فجابه النبي –صلى الله عليه وسلم- إلى المدِيّنة فأمر أن يحبس وحده
بس مش في سجن إنفرادي لأن فيها إذلال، حبسه فين؟ قعده لوحده في ركن في
المسجد، في المسجد؟ أولاً عشان مايبقاش حاطه بين أربع حيطان ثانياً عشان
يشوف الناس وهي داخلة وهي خارجة ويأتنس بيهم وعشان يخالط المسلمين ويشوف
المسلمين عايشين إزاي، ثم مر النبي عليه فقال: "يا ثمامة ما تراني أصنع
بك"، تفتكر أعمل فيك إيه بعد ما قتلت من أصحابي قال: "إن تقتلني تقتل ذو
دم"، أنا فعلاً عليا دم ليكم يبقى ليك حق، "وإن تعفوا وتنعم تنعم على شاكر"
هتلاقيني أشكرهالك، "وإن تريد مالا أعطيت لك ما تشاء من الأموال فأنا غني"
فتركه النبي وانصرف.. لسة عايز يتوضب، ثم عاد إليه في اليوم التالي قال:
"يا ثمامة ما تراني أصنع بك"، فقال: "إن تقتلني تقتل ذو دم وإن تنعم تنعم
على شاكر وإن تشاء مال أعطيتك من أموالي ما تشاء" فتركه النبي وانصرف، ثم
عاد إليه في اليوم الثالث فقال: يا ثمامة ما تراني أصنع بك، فسكت.. آه
خلاص، سكت ليه؟ إتكسر ووصل للدرجة اللي بعديها إهانة، فقال النبي: أطلقوا
ثمامة، خدت بالك أطلقه إمتى.. سابه يوم واتنين وتلاتة لغاية ما التعليم
ولغاية ما الأدب جاب وبعد كدة هيوصل للإهانة.. لأ، زي ما سيدنا يوسف عمل مع
إخواته.. لغاية ما قالوله وتصدق علينا.. إحنا خلاص ضعنا، قال: لا تثريب
عليكم اليوم.

تعرف
تعمل كدة؟ يعني لازم تعاقب بس توصل للحظة الإهانة.. الإهانة لأ، كأن النبي
بيعلمك أنا لا ههين عكرمة ولا ههين ثمامة، على فكرة يا جماعة نتيجة إن
النبي ما أهنهوش ثمامة خد بعضه أول ما النبي قال أطلقوا ثمامة وقام وأخد
الفرس بتاعه وطيران برة المدِيّنة، وأول ما طلع برة المدِيّنة دور على مكان
نزل فيه، وغير هدومه واغتسل وقام داخل تاني المسجد وقام قايل أشهد أن لا
إله إلا الله وأن محمد رسول الله، مارضيش يقولها أول ما أطلقوه عشان
الاعتزاز بالنفس، أنا خدت القرار بمزاجي زي بلقيس لما قالت وأسلمت مع
سليمان لأنها عزيزة، إوعى تهين نفسك والنبي بيعلمك كدة ويقولك كدة ويقولك (من تتبع عورات الناس تتبع الله عورته ولو بعد حين) إوعى تتبع عوراتالناسلتفضحهم إوعى تهنهم إوعى تدور إزاي تفضحهم هيهينك ربنا ويفضحك في بيتك، شفت النبي بيتعامل مع الناس إزاي علشان يحافظ عليهم.

طيب
في لسة نقطة فاضلة، نقطة إيه؟ إوعى تهين نفسك، إوعى تذل نفسك للناس عشان
فلوس عشان منصب، ما أنا الأول قلتلك إوعى تهين نفسك تعمل ذنب أو معصية،
إوعى تهين نفسك تشرب خمرة تدمن مخدرات، إوعى تهين نفسك تسرق، إوعى تهين
نفسك تخون، إوعى تهين نفسك بالمعاصي والذنوب، لكن في حاجة تانية إوعى تهين
نفسك بإنك تذل نفسك، شوفوا حديث النبي –صلى الله عليه وسلم- ( من تضعضع لغني لغناه فقد ذهب ثلث دِيّنه )
شوف كلمة تضعضع ده.. خلي بالكم الناس اللي بتطبل وبتذمر الناس اللي بتقول
أحلام سعادتك أوامر وشخبطت سيادتك تخطيط لمستقبلي و .. و .. و.. الناس اللي
بتنافق ( من تضعضع لغني لغناه فقد ذهب ثلث دِيّنه ) لأن ثلث دِيّنك
كرامتك، لأن ثلث دِيّنك عزتك، لأن إنت من غير عزة أسفل سافلين، شفت الفكرة
ديه.. يا ناس مهما كنت محتاج، ده ربنا بيقول على الفقراء.. الفقراء
المعتزين بأنفسهم [... يَحْسَبُهُمُ الجَاهِلُ أَغْنِيَاءَ مِنَ التَّعَفُّفِ...] {البقرة:273}، إوعى تكون فقير والفقر مشكلة.. فتبقى فقير وبتهين نفسك، يبقى في أسوأ من كدة؟

إوعى
تهين نفسك إوعى تذل نفسك، ده ربنا من أسماؤه الحسنى العزيز عارف يعني إيه
العزيز؟ (الذي يأبى الذل لعباده) لأنهم عباد العزيز.. عباد العزيز ما ينفعش
يكونوا مهانين، إوعى تذل نفسك لصاحب منصب شوفوا النبي – صلى الله عليه
وسلم- يقولك إيه (اطلبوا الحوائج بعزة الأنفس فإن الأمور تجري بالمقادير) لما
تطلب حاجة إطلبها بعزة نفس مش معنى كدة إنك ما تطلبش.. لأ تروح وتخبط..
وأنا ليا طلب ومن فضلك ممكن تقضيلي المهنة الفلانية وتطلبها بأدب وبأخلاق
وبذوق وأرجوك لو سمحت، ما بقلكش تبقى بقى قليل الأدب..لأ لأ لأ إطلبوا
الحاجات بعزة أنفس فإن الأمور تجري بالمقادير، بس إوعى تهين نفسك إوعى
تحطها في التراب وإنت عبد العزيز.. العزيز سبحانه وتعالى، شوف سيدنا علي بن
أبي طالب بيقولك إيه.. كلمة حلوة قوي، يقولك ( والله والله لكنس الجزيرة
بريشتين.. ) حاجة معقولة الجزيرة العربية تتكنس بريشتين؟ ( والله والله
لكنس الجزيرة بريشتين ونقل جبلين ثقيلين أهون عندي من ذل نفس للئيم ) إنك
تذل نفسك لواحد لئيم.. والله والله لنقل جبلين ثقيلين أهون عندي من إني أذل
نفسي لواحد لئيم.

ممكن
بقى أطلب منك طلب، أدي الحلقة.. عايز مني إيه؟ عايز منك حاجتين.. إوعى
تهين نفسك بالمعاصي والذنوب وإوعى تذل نفسك عشان تطلب حاجة إنت عايزها، إنت
مكرم إنت عزيز والله هتعيش سعيد، عارف واحد فقير لكن عزيز.. سعيد، وواحد
غني لكن بيذل نفسه للي أغنى منه.. ذليل، يا جماعة الحاجات المادية ما بتخشش
على السعادة على طول، بينها وبين السعادة مسافة إسمها النفس، يعني أنا
معايا فلوس ماوصلتش للسعادة.. لأ ده في مسافة.. المسافة ده إسمها إيه؟
إسمها القلب والنفس، فلو الماديات موجودة وده بايظة مش هتوصل للسعادة بص
المسافة ده أدي الماديات وأدي النفس وأدي السعادة، عايز أروح من هنا لهنا
لازم تعدي على القلب الأول لازم تروح للقلب الأول، فلو القلب ذليل يسعد
إزاي، خد فلوس يا عم وخد مناصب وخد شهوات وبردو تعيس، والله لازم تعدي على
القلب الأول، إوعى تهين نفسك، وإذا كان في ذنب بتعمله بقالك مدة وقفه بقى
عشان ماتهنش نفسك، إوعى تهين نفسك في خيانة إوعى تهين نفسك في سرقة إوعى
تهين نفسك في رشوة، خلي بالكم المرتشي وهو بياخد الرشوة ذليل.. والله ذليل،
رغم إنه راجع بفلوس كتيرة ذليل.. ذليل من جواه، وفي عنين الراشي.. ياه
الراشي بيبصله إن هو ذليل، والراشي وهو بيدي الرشوة في عنين نفسه ذليل
وقلبه واقع تحت، إوعى تهين نفسك.

طب أعمل إيه عشان أعيد لنفسي عزتها وكرامتها؟

· تدريب
لمدة واحد وعشرين يوم، على إيه؟ عزة نفس، دور على الحاجات اللي بتخليك
تهين نفسك، ها.. الشات الفلاني.. كذا كذا على الفايس بوك، بكزدر .. بكزدر
ده بالبناني، بلفلف في الشوارع.. بلفلف ده بالسعودي، بلف في الشوارع بالليل
أعاكس بنات وقف ماتعملش حاجة بتهين نفسك، اللي يهين نفسك وقفه، دِيّن
واحد، يبقى تدريب لمدة واحد وعشرين يوم.

· أعمل إيه كمان عشان ماهنش نفسي؟ التوبة.. تبت يا رب من الذنب الفلاني، مش أنا قلتلك إزاي السعادة يتنزل فجأة؟ والله
ترجعلك فجأة، يعني بعد الحلقة ده.. والله والله والله.. واحد يقول كدة..
مانا واخد رشوة تاني، نفسي واحد يعملها بعد الحلقة ده، ياه تخيلوا، والله
هتعيش سعيد وولادك ياكلوا من حلال يقول الرسول –صلى الله عليه وسلم- (كل لحم نبت من حرام فالنار أولى به) وترجعلك سعادتك وعزة نفسك وكرامتك.

الرشوة انتشرت قوي يا جماعة، بالله عليك أي حد في إشارة مرور أي حد في مصلحة حكومية أي حد في وزارة أي حد في شغل أي حد في business خاص أي حد عشان يمشي شغل إنوي بنية إن ربنا يكرمك ويعزك ويرفعك، يقول تعالى [... وَمَنْ يُهِنِ اللهُ فَمَا لَهُ مِنْ مُكْرِمٍ ...] {الحج:18}، إنوي من إنهاردة مافيش رشوة من إنهاردة مافيش معاكسة من إنهاردة مافيش خيانة، تيجوا نركز على التلاتة دول، يبقى:

1. التوبة.

2. تدريب واحد وعشرين يوم.

3. استر الناس عشان ربنا يسترك، استر الناس.. استر الناس ربنا يسترك لحسن يفضحك لو فضحت الناس.

4. الحاجة
الأخيرة إوعى تجاهر، إوعى تجاهر لو إنت على خطأ، يعني يا تسيبه ي إما لو
عليه إستر نفسك قوي إوعى تجاهر بيه على فايس بوك ولا في شارع ولا في نادي،
إوعى والمجاهرة.

دي
كانت موانع السعادة الأربعة، وخلصت المجموعة بتاعة نفس نقية من موانع
السعادة، يا سلام لو نقيت نفسك، وخلصت من العلامة ده، مش هنوريهالكم تاني
العلامة ده خلاص، هنتنقل من بكرة لمجموعة جديدة جميلة قوي قوي قوي، قلب
كبير، أشوفكم بكرة إن شاء الله، والسلام عليكم ورحمة الله وبركاته.